Author - Светлана Мисюкевич

З 16 па 27 мая 2022 года на базе Інстытута павышэння кваліфікацыі і перападрыхтоўкі кадраў ГрДУ імя Янкі Купалы прайшлі курсы павышэння кваліфікацыі “Сучасныя тэхналогіі бібліятэчнай справы”. Удзельнікамі курсаў былі супрацоўнікі навуковай бібліятэкі ГрДУ імя Янкі Купалы, а таксама калегі з Гродзенскага дзяржаўнага медыцынскага ўніверсітэта.

У праграме курсаў асаблівая ўвага надавалася стратэгічным прыярытэтам развіцця ўніверсітэцкіх бібліятэк, выкарыстанню ІКТ у бібліятэчнай рабоце, ролі бібліятэкі УВА ў арганізацыі асноўных працэсаў. Актуальнымі былі псіхалагічныя трэнінгі па тэмах: “Псіхалагічная прафілактыка прафесійнай дэфармацыі асобы работніка бібліятэкі” і “Стрэс-копінг у прафесійнай дзейнасці работніка бібліятэкі”. Лектарамі – супрацоўнікі ГрДУ імя Янкі Купалы, БДУ і БНТУ. Па словах старшыні ББА, дырэктара Фундаментальнай бібліятэкі БДУ Уладзіміра Кулажанкі, Купалаўскі ўніверсітэт – адзіны рэгіянальны ўніверсітэт, дзе на пастаяннай аснове праводзяцца курсы павышэння кваліфікацыі для супрацоўнікаў бібліятэк.

Для ўдзельнікаў курсаў былі арганізаваны экскурсіі ў Гродзенскую абласную бібліятэку імя Я. Ф. Карскага і Свята-Барыса-Глебскую Каложскую царкву.

Пасля паспяховай здачы заліку ўсім удзельнікам курсаў былі ўручаны пасведчанні аб павышэння кваліфікацыі.

У межах супрацоўніцтва Гродзенскай епархіі Беларускай Праваслаўнай Царквы і ўстановы адукацыі «Гродзенскі дзяржаўны ўніверсітэт імя Янкі Купалы» 26 мая ў чытальнай зале навуковай бібліятэкі (Ажэшкі, 22, аўд. 116) адбылася прэзентацыя кнігі Алены Бабіч «Кніга пра цуды» (пра абраз Божай Маці «Усецарыца» ў храме святога Архангела Міхаіла ў в. Сынкавічы).

Што такое цуд? Ці ёсць алгарытм, які да яго вядзе, з кім здараюцца цуды, як да іх ставяцца ў хрысціянскім свеце – гэтыя пытанні аўтар задае людзям, якія дзякуюць за дапамогу Багародзіцы перад яе цудатворным абразам «Усецарыца» ў храме святога Архангела Міхаіла ў маленькай вёсачцы Сынкавічы.

Дадзеная прэзентацыя была арганізавана сумесна з протаіерэем Аляксандрам Балоннікавым, настаяцелем Свята-Барыса-Глебскай Каложскай царквы, каардынатарам супрацоўніцтва паміж Гродзенскай епархіяй і Купалаўскім універсітэтам. На сустрэчы прысутнічаў іерэй храма Архангела Міхаіла ў в. Сынкавічы Віталь Шостыр, які расказаў пра гісторыю царквы абарончага тыпу і пра з’яўленне абраза ў храме.

Азнаёміцца з кнігай можна ў навуковай бібліятэцы.

З 23.05.2022 па 30.06.2022 адкрыты бясплатны тэставы доступ да рэсурсаў ЭБС «Кансультант студэнта» https://www.studentlibrary.ru/

Для актывацыі (перарэгістрацыі) доступу трэба зарэгістравацца з IP-адрасоў універсітэта (з любога стацыянарнага камп’ютара ў лакальнай сетцы ўніверсітэта).

Спампаваць інструкцыю па рэгістрацыі можна па спасылцы: https://lib.grsu.by/wp-content/uploads/2022/05/Instruktsiya-po-rabote-s-EBS-Konsultant-Studenta.pdf

Гэтак жа вы можаце паглядзець спецыяльнае відэа па спасылцы: YouTube – https://www.youtube.com/watch?v=yEb9FEbiaXM&t=65s

7 красавіка на базе навуковай бібліятэкі прайшла квэст-гульня «Купалаў след у Alma-mater» для студэнтаў Купалаўскага ўніверсітэта.

Удзел у гульні прынялі 11 каманд з розных факультэтаў.

Мерапрыемства прадугледжвала праходжанне пэўных кропак, на кожнай з якіх каманда выконвала пэўныя заданні, а таксама атрымлівала падказку куды рухацца далей. Удзельнікі разгадвалі рэбусы, крыжаванкі, загадкі, збіралі пазлы, рашалі матэматычныя задачкі, займаліся пошукамі схаваных прадметаў…

Заданні сённяшняга квэсту былі тым ці іншым чынам звязаныя з асобаю Янкі Купалы.

Усе ўдзельнікі атрымалі падзякі, памятныя і салодкія падарункі.

Асобным падарункам узнагароджана каманда педагагічнага факультэта за перамогу ў фінальным бліц-апытанні.

А пераможцамі квэсту сталі:

1 месца – каманда факультэта інавацыйных тэхналогій машынабудавання.

2 месца – каманда інжынерна-будаўнічага факультэта.

3 месца – каманда факультэта гісторыі, камунікацыі і турызму.

Віншуем пераможцаў!

P.S. Больш фота ў сацыяльных сетках